SURA mpya katika ulingo wa kisiasa zinaibuka kwa ujasiri kuelekea Uchaguzi Mkuu wa 2027 na kuwa mwiba kwa vigogo wa miaka mingi.
Kundi hili jipya la viongozi tayari linaonyesha dalili za kuleta mabadiliko ya kizazi ndani ya vyama vyao, kwa kuwapa changamoto viongozi wakongwe au kuchagua kujijengea misingi yao ya kisiasa mapema kabla ya uchaguzi ujao.
Kuibuka kwao katika siasa za kitaifa kumewaweka katika nafasi nzuri ya kuwania nyadhifa za juu, ikiwemo urais.
Mabadiliko haya ya kisiasa yanaashiria kupungua kwa ushawishi wa vigogo wa jadi huku wanasiasa vijana wakichukua uongozi kwa kasi. Miongoni mwa vijana wanaojitokeza wazi ni Katibu Mkuu wa ODM, Edwin Sifuna, na Mbunge wa Kiharu Ndindi Nyoro, ambao wametajwa kuwa miongoni mwa wanaoweza kuwa wagombea wenza katika kinyang’anyiro cha urais 2027.
Wengine wanaoibuka ni Mbunge wa Embakasi Mashariki Babu Owino, Seneta wa Nyandarua John Methu, Mwakilishi wa Wanawake wa Kirinyaga Njeri Maina, Mbunge wa Nyali Mohammed Ali na Naibu Kiongozi wa chama cha Democracy for the Citizens Party (DCP) Cleophas Malala.
Sifuna anaongoza kundi la “Linda Mwananchi,” lililojitenga na ODM na kupinga serikali jumuishi pamoja na uongozi wa Oburu Oginga. Wachambuzi wanasema Sifuna na Nyoro ni miongoni mwa viongozi wa kuangaliwa kwa karibu, wakiamini wana uwezo wa kubadilisha mwelekeo wa siasa za upinzani na hata matokeo ya uchaguzi wa urais.
Kundi la Sifuna, ambalo linaungwa mkono kwa kiasi kikubwa na vijana, limekuwa likifanya mikutano ya kisiasa kote nchini kwa lengo la kuhamasisha wananchi na kuleta uongozi unaozingatia maslahi ya wananchi wa kawaida.
Kwa upande mwingine, Nyoro amejiimarisha kama mbunge mwenye hoja nzito na anayezingatia sera. Ingawa bado ni mwanachama wa chama tawala cha UDA, amejitokeza kama mkosoaji mkubwa wa baadhi ya sera za serikali ya Kenya Kwanza, hasa katika masuala ya uchumi.
Mbunge huyo aliwahi kuwa mwenyekiti wa Kamati ya Bajeti na Matumizi ya Bunge la Kitaifa kabla ya kuingia katika mvutano na Rais William Ruto. Pia aliibuka kuwa mmoja wa waliopinga uuzaji wa asilimia 15 ya hisa za Safaricom kwa Vodacom, akidai kuwa zilikuwa zimepunguzwa thamani kwa kiasi kikubwa.
Babu Owino, aliyepata umaarufu akiwa kiongozi wa wanafunzi katika Chuo Kikuu cha Nairobi, ameendelea kujijengea jina kama mwanasiasa mwenye msimamo mkali na anayewavutia vijana hasa katika maeneo ya mijini.
Seneta Methu naye ameibuka kama mkosoaji mkubwa wa serikali, huku akijijenga kama mshirika wa karibu wa Rigathi Gachagua.
Vilevile, Njeri Maina na Cleophas Malala wanatajwa kama nguzo muhimu katika siasa mpya zinazoibuka.
Aidha, majina mengine yanayoibuka kwa kasi ni pamoja na Anthony Kibagendi, Joshua Kimilu, Danson Mwashako, George Natembeya na Pauline Njoroge, ambao wanazidi kujipatia umaarufu kupitia siasa za kitaifa na mijadala ya umma.
Katika eneo la Pwani, Mohammed Ali amejiweka kama sauti tofauti kwa kupinga wazi azma ya Rais Ruto ya kuchaguliwa tena, na tayari ametangaza nia ya kuwania ugavana wa Mombasa.
Hata hivyo, viongozi wengine kama Naibu Gavana wa Kakamega Ayub Savula wanashauri wanasiasa vijana kuwa waangalifu katika maamuzi yao ya kisiasa. Anasema wana nafasi bora zaidi wakishirikiana na serikali ya sasa huku wakijiandaa kwa nafasi za juu mwaka 2032.
Kwa mujibu wa wataalamu wa siasa, idadi kubwa ya vijana nchini inapatia nguvu kizazi hiki kipya cha viongozi. Takwimu zinaonyesha kuwa wananchi wenye umri kati ya miaka 18 hadi 40 wanaweza kufikia asilimia 57 ya wapigakura, hali inayoweza kubadili kabisa mwelekeo wa siasa nchini.
Hata hivyo, changamoto kubwa kwa viongozi hawa ni jinsi watakavyojenga imani na wapigakura kwa kuwasilisha sera thabiti na kujitegemea kisiasa bila kutegemea miundombinu ya viongozi wa zamani.
from Taifa Leo https://ift.tt/8DLhnXO
via IFTTT
Tags
TRENDING NEWS